Rreth 20 mijë qytetarë nga Evropa u mblodhën para dhe në sallën “Juan Antonio Samaranch – Zetra” në kryeqytetin e Bosnjë dhe Hercegovinës, Sarajevë, ku kanë pritur ardhjen e Presidentit të Turqisë, Recep Tayyip Erdoğan, raporton Anadolu Agency (AA).

Mes flamujve turq dhe të Bosnjës, në sallë janë valëvitur edhe flamuj të Shqipërisë, si për të treguar lidhjen e fortë të këtyre shteteve falë historisë dhe komunitetit të madh mysliman.

Erdoğan sot mbërriti për një vizitë pune në Bosnjë, ndërsa është planifikuar edhe aktivitet i tij në sallën ”Juan Antonio Samaranch-Zetra” ku do të mbahet Kongresi i gjashtë i Unionit Evropian të Demokratëve Turq (UETD).

Presidenti turk u takua me kryesuesin e presidencës së BeH-së, Bakir Izetbetgoviç dhe gjatë ditës do të nderohet me doktoratë nderi nga Universiteti Ndërkombëtar i Sarajevës (IUS).

Së bashku me Erdoğan-in, në delegacionin e tij, ka udhëtuar edhe bashkëshortja e tij, Emine Erdoğan, e cila do të hapë Klinikën për Hematologji në Qendrën Klinike të Universitetit të Sarajevës (KCUS).